1Ti 2 | MHL | STEP | Aria ni sira fain oneka naep nefa maakiyem, sira manek akena nain feenap. Ni Mua Maneka kema wuami farem-ikeka, fariwkin wi mua wia asipam-ikainok, wi owow saria ne wi anim onoma pun. Wi nain wia kema suuwap Mua Maneka sira eliwa naem-ikeka. Ni Mua Maneka anane maneka farem-ikaiwkin kema sonom eliwa, pokow eliwa yiinok, ne ona sira kakeniw wiar ookowa nain yia asipinok, ne sira eliw akena yia ofakowinok.

1 Timothy 2

Mua maneka farowa sira

1 Aria ni sira fain oneka naep nefa maakiyem, sira manek akena nain feenap. Ni Mua Maneka kema wuami farem-ikeka, fariwkin wi mua wia asipam-ikainok, wi owow saria ne wi anim onoma pun. Wi nain wia kema suuwap Mua Maneka sira eliwa naem-ikeka. Ni Mua Maneka anane maneka farem-ikaiwkin kema sonom eliwa, pokow eliwa yiinok, ne ona sira kakeniw wiar ookowa nain yia asipinok, ne sira eliw akena yia ofakowinok.

3 Mua Maneka farowa sira nain eliw akena. O ona waisow i yia aawiya nain-ke, ne feenap kookaliya, wi mua iiwawun wia aawemkun opor makena onoma efar amisaruk naek. 5 Moram Mua Maneka kuisow akena. Ne gone mua pun kuisow, mua nain Yeesus Krais. I miiw mua, Mua Maneka mikikira iwep ikemkun os-ke yia kakenami Mua Maneka wameiya epaskun yia wuak. 6 I miiw mua pina aawep umekamik nain, muut nain Yeesus Krais-ke epa yiar aawep umok. Ona epa kerereya naap oneya i amisaremik, Mua Maneka i yia aawowa kookaliya. 7 Naapeya uuwowa onome naep owow unowa efa sesekeya ona opor makena ariman wiar wuami wia maakem-miawiyem, wi kema aawep ookuk naep. Yo opor makena maiyem, me sailiyem.

8 Yo feenap kookaliyem, anane lotu onami wi mua wapena fakerap Mua Maneka faruk. Wi kema bagiaw marew, riirinowa marew ikok naap onuk.

Wi emeria sira

9 Aria wi emeria pun naap, alakuemi mia suuwowa sira-sira me wuauk, wi mia suuwowa wia urufowa anirowa nain suuwuk. Mua kema wia aawu naep wiena afifa me rirismuk, ne maa bala sira-sira me wiam opuk, kululuma sira-sira ne maa bala maamuma maneka-pa sesenarimik nain me wuauk. 10 Mua Maneka opora wiar ookowa kookal-afurap-na uuwowa baliwep wiar onuk, ne wiena mauwowa nain-ke wiena bala saarik wiar ikainok.

11 Wi kekelka ikok opora miimami amisa aawem-ikauk. 12 Wis-ke iikirap wi mua me wia nomakep lotu epa-pa Mua Maneka opora me wafuruk, weetak. Wi oram miimowa muutiw ikauk. 13 Moram mokomokoka Mua Maneka-ke Adam onak, ne naap ikok Eewa onak. 14 Ne pun, Satan wadol opora maemi Adam me peeskimok. Emeria nain peeskimeya pina onak. 15 Nain wi emeria muukarem-ikauk. Wi Mua Maneka opora baliwep wiar opikuan, wiena mua wia kookalikuan, pokow eliwa sira baliwep ookikuan-na Mua Maneka-ke eliw wia aawinon. ^{▼▼2.15Opora fain kemena imenowa yoowa.}